KLIK YE..TAKKAN NAK TENGOK AJE...

FOLLOW ME DER....

Sunday, November 4, 2012

Sebana Baru Putus Pengerindu..( Rintihan Selepas putus cinta)

Sulu..

Agi  bedau bekau  madang bukau
Alai tua betikau  bemain ma'
Agi bedau  serepang  madang  kelindang
Alai  tua  bebelat  betinggang  berang

Asai  enggai  nusi penyinu ati
Asai enggai  madah  penusah ditengah
Ka enda  awak  semua  bela  macha
Bela  ampit  betusi  mimit
Bela  bedua  bekunsi  empa
Bela  ninga  leka  sada pengerindu  tua
Pengudah  nuan ninggal  lalu  ngelengka..

Ambai..
Lembau ka  nusi pengelandai  tanah  seberai
Lembau  ka nyerita  ke  tanah  entua
Tang  enti  udah dicerita  lantang meh mua
Enti  udah ditelai  lantang  ga  pejalai

Tang nemunya nyau  meri pedih  meruan melilih
Meri  penusah  betinggang  ruah
Enti  bakatu enda ulih seliahka meh  jalai serumah
Enda ulih  begulai meh tua jalai  pendai
Ka enda kediri meh tua  mandi
Enda  begulai meh tua  penyangkai
Ngicha ke badu  begiga  berimbai  ruai
Badu  betanya  nurun  pejalai

Enti  suba  saum  jalai  kunsi  pemakai
Diatu  jalai  pendai  enda  tau ditiki
Kena  empang enggau  daun  kelindang
Kena  pelepa  enggau  daun  lemba
Pandak  jaku  beserara  aja
Asa udah buya tang  ngempu  alu  enda

Ingat  nuan  ambai...
Suba  aku baka tanah  temuda di rimba
diatu aku  nyau  baka  dampa  dibuai  leka
suba  aku  tu  meh  tungkul  ati  pengering semengat
Diatu  aku  dikumbai  mai  penyakit  chelap  angat
Suba  mua  aku dipeda  nuan  baka senaya  bulan
Diatu  nuan  meda  aku  nyau  baka meda  antu  sitan
Suba  enti ka makai disenduk  ke asi
Enti  bejalai  beiring  bepegai  jari
Diatu  enti  ka  makai  nyuap  kediri
Enti  ka  bejalai  aku  semampai  entudi..
Suba  enti  gatal begaru pangan diri
Diatu  anang  ka  begaru meda pan nuan nguing  ke tisi

Sampai  nuan  pergi ngejang  belalai
Mai  pengerindu tekesai  lanjur  nadai
Ngujung  ke aku sakit  lengit  enda  pengerai
Tabin  birin  nyau  asai  ke pansa utai
Mimpi  jai  meda nuan enggau  orang  bukai
Tali  pengerindu  nyau  udah  tekusai
Pengikat  penyayau  nuan  udah retai
Pandak  jaku beserara  meh  tua  ambai..
Mupuk  meh  aku  mupuk  begadai....



0 comments: